قصيدة الا رفقا بقلب .. قد هوى عينك للشاعر احمد الردعان مكتوبة
ياخوف ابوي ، وعطايا بلادي
في قيد حضنك منى القلب حبسه
حبي لشخصك .. مهو حب عادي
احبك اكثر من الحب .. نفسه !! .
. ( نص دينك )
الا رفقاً بقلبٍ .. قد هوى عينك
عشقْك بْكل تمرّد ما عشق بشويش
أخذني من يدين الحلْم .. لـ يدينك
اباعيش الهوى واقع بلا تشويش
انا في غيبتك كيف أسألك وينك ؟
مدامك في يسار الصدْر هذا تْعيش .
.
حبيب الجرح دام الجرح سكينك
تعذبني بكيفك .. ماسالتك ليش ؟! .
.
عسى مالي حياه الا حوالينك
عسى ماذوق عقبك من لذيذ العيش
انا حلمي اكون بْيوم .. نص دينك
ولو حتى بغرفه من غصون ، وريش
سجد قلبي غوا .. لاعجاز تكوينك
مثل م اغوت كلوبترا .. زعيم الجيش
معك كلما تكبّر وجهك اسنينك
تزايد وجهك الطاهر دلال وطيش
من اسود شعْرك اليا كعْب رجلينك
حكاية فتنةٍ .. ما تقبل التهميش !
دخيل اللي رجح فيني موازينك
اذا منت المحبه .. فالمحبه ويش ؟
مدام اني لقيت العمْر في عينك
بلا عينك حبيب العمْر .. كيف اعيش ؟
كتب ربي اعيشك عشْق واموتك
هواك ؟ اعظم قدر زانت به أيامي
انا قلبي يطييير .. اليا سمع صوتك
تخيّل عاد لامن صرت .. قدامي ؟! .