قصيدة لا صارت الساعه سبع احمد الردعان قصائد مكتوبة
لاصارت الساعه سبع
تتهمش الدنيا ونبضاتي تزيد
لاصارت الساعه سبع
تتساقط العالم من عيوني ،
وتظل ف عيوني وحيد
تكرار الأشياء سيّدي جداً مُمل
الا لقاك .. ف كل يوم يتكرر
وكل يوم احس بشعورٍ جديد !
لاصارت الساعه سبع
ودي من الفرحه اطييييرر
واكثر من الحيره احيرررر
ف العطور ، والملابس ، والحوار
كل ما القى لي اختيار
ارجع استخير
وعمت الفوضى زوايا غرفتي
من لهفتي .. الا يطول حكايتي
وانا اسير امرايتي
لاجيت ابسالها واخير
باي مظهر يعجبك ودي اصير
ترى الدقايق قبْل لا تْلاقي حبيبك
اصعب عليك مْن اللقى نفسه بكثير
لا صارت الساعه لقاك
اتأملك كأن لم يُخلق سواك
بعد ما احْلم وامنّي
التقينا وصرت اغنّي
ياعيون الكون غضّي بالنظر
ماني مصدّق عيوني ويش اشوف
مدري اصرخ لك احبك ؟
او اسجد لربي شكر ؟
الاكيد اني لكفك بالسلام
صرت انا كلي من اللهفه كفوف
جيتني واحيتني
مثل المطر في قاع ممليّه ضما
او دعوة أم وصادفت ليلة قدر
وسط مقهى
ممتلي شوق وهيام
كنّا نتعانق الف مره بالشعور
لو ما تعانقنا حبيبي بالسلام
وانت في نصف السوالف لاحكيت
وجيت اقاطعك ب احبك
واستحيت
على كثر ماحكي وحكيت
احبك اللي جات في نص الكلام
اجمل اللحظات كلها والكلام
ياللي غرامك سادني
نادني ..
باي اسمٍ تحبه ولكن
لا تسمّيني حبيب
المحبه كذبة الكاتب
لقرّاء القصص
ولا انا طفلك ، وابوك
واقرب اصحابك ، واخوك
من كثر ماحب
كل يوم ب شكل
صرت احس الحب بالدنيا خلص
على كثر ماني ابيك
ابعتذر عن كل عمري قبل اجيك
على كل احبك قلتها لغيرك زمااان
وعلى كل ايامي معاهم والحناااان
العمر ماهو عمر
قبل التقيك
صرت احس اللي مضى
بروفة غرام
لجل احبك في شكل
لايق عليك 🙂 قبل تروح
وينتهي موعد لقاك
غمض عيونك
وخل نحلم سوا
لو يجمعنا نصيب
ونتجاوز مرحلة خل وحبيب
تخيّل اني بكل ساعاتك معاك
والله لخلي كل ساعاتك سبع